قرأت سابقا كلمه لأحد الكتاب الكبار ــ لا اذكر اسمه الآن ــ أن مَن لا يسعد نفسه لن يسعده احد آخر .. و ازيد من عندى انه ايضا لن تكون لديه المقدره لإسعاد الآخرين .... و بناءا عليه فقد تعودت منذ زمن بعيد ان اكون انا سبب سعادتى الاول و الاخير ــ ربنا يخلينى ليا ــ تزيد سعادتى بالطبع عندما تأتى السعاده من مصادر خارجيه ــ زى الكتب الخارجيه كده ــ و اكيد ساعتها بدعى ربنا انه يخليلى المصادر الخارجيه
و لأننى كائن اجتماعى اعيش و اتعايش مع آلام الغير و احزانهم و بالتالى بيصعبوا عليا جدا و بيبقى نفسى ساعتها انى اطبطب على كل حزين و اواسى كل مكتئب و اطيب خاطر كل مهموم و لكن لتعذر ذلك لكثرة عدد الحزانى و المكتئبين و المهمومين إذ قارب عددهم على سبعين مليون حسب آخر احصاء و ذلك طبعا بفضل سياسة حكومتنا الرشيده فى زيادة الاعباء و الاحمال على المواطنين الشرفاء ــ الحقيقه حكومه غير مسبوقه فى عدد الكوارث و المصائب اللى حلت بالبشر من يوم ما جم لدرجة انى ساعات بتخيل انهم بيحاولوا يعملوا سكور يتسجل لهم فى موسوعة جينيس للارقام القياسيه و ساعتها ممكن يسموه الرقم القياسى لحكومة قنديل فى القضاء على المواطن المصرى الاصيل ــ ممكن حد يسألنى طيب و ال 15 مليون اللى فاضلين اخبارهم ايه ؟؟ طبعا بعد ما اشكر الامن و هيئة تنظيم الاستاذ ــ كابتن لطيف ستايل ــ ممكن اقول ان الباقيين يا اما تبع الحكومه يا اما مغيبين و مش فاهمين حاجه م اللى بيحصل دا طبعا غير الاطفال حديثى الولاده و لحد سن 6 سنوات
ما علينا من كل ده ارجع للموضوع الاصلى بقى و أقول : اخى الناخب تؤ تؤ تؤ لأ لأ مش ده ــ اخى الناخب ده انا مخاصماه اصلا ــ أخى المواطن المصرى فى الشوارع و الحارات فى القرى و المراكز و النجوع فى بحرى و الدلتا و الصعيد اللى راكب عربيه و اللى ماشى على رجليه اللى بيفتح عينيه كل يوم الصبح و هو بيقول يا فتاح يا عليم يا رزاق يا كريم يارب سترك و عفوك و رضاك اصطبحنا و صبح الملك لله قصدنا بابك يا كريم و من قصدك لا يخيب و اللى بيفتح عينه الصبح برضه و هو بيقول بون جور يا سوسو ـــ اصل الصراحه الهم طايل الجميع ــ المواطن المصرى اللى بيعمل جمعيه علشان يبيض بيته و اللى بيلغى حفلة خطوبة بنته علشان جيرانه عندهم عزا المواطن المصرى اللى بيهرب من نظرات ولاده لما ييجى اعلان الجبنه فى التلفزيون لأنه ببساطه ميقدرش على سعرها .... المواطن المصرى الجميل اللى بس كل اللى ف نفسه انه يفهم .. يفهم بس اللى بيحصل حواليه ــ صعبه دى ؟؟ ــ .... عرفت بقى ؟؟ ايوه هو انت اللى تهمنى ...حاول تريح نفسك حاول تخرج من منظومة القهر اللى انت عايش فيها و جرب كده اللى هقوله لك .....
بطل مقارنه ... بطل تبص حواليك .. بطل تضحك على نفسك .. اوعى تسيب شكلك يبقى وحش قدامك بطل تنتقد فى نفسك طول الوقت.... شجعك و اضحك فى وشك فى المرايه و لو مره واحده كل يوم
بطل تهتم تقول للناس تصبحوا على خير ــ يصبحوا و لا ميصبحوش دى مش مشكلتك ــ بطل تستنى الناس يصبحوا عليك و خليك فاكر انك الخير فى كل صباح لكل اللى يعرفوك ...... حس بقيمة نفسك انت مخلوق من مخلوقات الله و كفاك عزا و فخرا انك من خلق الواحد الاحد
بطل تستنى حد اللى هيفوتك هو الخسران .... بطل تأول كل حاجه على انها اشاره كونيه ف الاشارات للاغبياء الكسالى فقط .....بطل تطبطب على كل حد يكلمك خليك نفسك و بس
بطل و لو مره تمشى على الرصيف و امشى فى وسط الشارع و بص للعربيات بكل تعالى و قول لهم : ايه انا ماشى فى شارع الحكومه .... بس الامر ميمنعش انك تبص يمين و شمال برضه مش ناقصين حواذث الله يخليك
بطل تمشى جنب الحيطه اصلها لو وقعت اول ما هتقع ... هتقع على دماغك و انت اللى ــ بعد الشر عليك ــ هتموت
بطل تقفل الشباك و انت نايم... افتحه مره و سيب الشمس تصحيك الصبح و تخيل انك نايم فى الغابه و امعانا فى التخيل استلهم سلوك القرد مثلا و اقفز من السرير الى التواليت الى الدولاب مع اطلاق صيحات فرح متتابعه و لا تلق بالا لزوجتك و هى تجرى على الموبايل و تتصل بأقرب طبيب نفسى عذرها انها لم تصل بعد لتلك الدرجه من الصفاء النفسى
بطل تتجاهل الحيوانات ..... و لما تشوف القطط فى الشارع الصبح قول لهم صباح الخير ازيكم عاملين ايه النهارده ....... بس ممكن تخاصم البوبيهات و متكلمهمش ــ آخر حد اعرفه حاول يكلمهم بناءاً على نصيحتى لسه بياخد حُقن المصل لغاية دلوقتى ــ و بطل تتجاهل الطيور و ركز اوى مع العصافير اللى ساكنين فى الشجره اللى جنب شباكك ــ دول برضه جيرانك ــ هتسمعهم الصبح و هما بيقسموا الشغل على بعض و بيتفقوا على الغيط اللى هيروحوا يشتغلوا فيه
بطل تتعامل مع الاشياء الجامده على انهم مبيحسوش .... عاملهم على انهم بيحسوا و صدقنى بعد شويه هتلاقى عندك اصحاب كتير حواليك طول الوقت ــ انا عن نفسى مسميه اللاب توب عفيفى و الموبايل لاللو و الغساله جلبهار و العربيه فوزيه البوتاجاز محروس ــ
بطل تكتم فى نفسك و تنكسف و واجه و قول للاعور انت اعور فى عينه اللى فاضله .... افتح قلبك للناس و خدهم بالحضن ــ معنويا طبعا ــ قرب منهم و ارحم و افهم ضعفهم البشرى ...... راقب الناس و توقع ردود فعلهم على ضوء معرفتك بيهم هتنبسط اوى لما تلاقيهم بيعملوا نفس رد الفعل اللى انت متخيله ..... افرح بنفسك و كافئها و هات لها هديه و لو حتى شوية لب
